حكاية سورة آل عمران: قصة ست غيرت التاريخ كله!
حكاية سورة آل عمران: قصة ست غيرت التاريخ كله!
كتير مننا حافظين اسم السورة، سورة آل عمران... بس يا ترى نعرف مين "آل عمران" دول؟ وإيه حكايتهم؟ تعالوا نحكي قصة فيها أب وأم وبنتين، قصة نزلت في القرآن، وهزت الدنيا كلها!
الأحداث دي اتذكرت في سورتين في القرآن بس... سورة آل عمران وسورة مريم. والنهاردة هنعيش مع بعض تفاصيل القصة دي، ونشوف إزاي أسرة بسيطة قدرت تغير مجرى التاريخ كله!
.png) |
في قلب فلسطين: قصة عائلة في زمن الفتن
عيلتنا دي مكانتش من الأغنياء، كانوا ناس على قد حالهم... عايشين في فلسطين في وقت الرومان كانوا مسيطرين على الدنيا. الرومان دول كانوا وثنيين، وبيعبدوا آلهة كتير، وفتنوا الناس وخلوا اللي يؤمن بكلامهم هو اللي تمام واللي ما يمشيش على هواهم يتبهدل ويا ويله. أي حد مكنش بيوافقهم كانوا بيعذبوه وبيضطهدوه، وكمان كانوا بيفرضوا على الناس ضرايب كتير قوي، وخرّبوا الدنيا بمعنى الكلمة. وعملوا ساحة كبيرة، أي حد يرفض دينهم يرموه للأسود والنمور ياكلوه.
- ست اسمها "امرأة عمران" كانت شايفة كل ده، ونفسها تعمل حاجة تغير بيها الوضع. قولنا في الأول إن عندها بنتين، بس هي دلوقتي عندها بنت واحدة بس.
البنت دي اتجوزت سيدنا زكريا، وفضلوا سنين طويلة مش بيخلفوا، بس بعد كده ربنا هيكرمهم بسيدنا يحيى.
دعوة من القلب: امرأة عمران تتمنى ولدًا!
طب تخيل معايا كده... سيدنا زكريا نفسه قال (قَالَ رَبِّ إِنِّي وَهَنَ الْعَظْمُ مِنِّي وَاشْتَعَلَ الرَّأْسُ شَيْبًا)، يعني خلاص كبر في السن... يبقى مرات عمه اللي هي حماته بقى عندها كام سنة؟ الست دي بقى نفسها تخلف، وقالت لازم تجيب ولد، هو اللي يقدر يصلح كل اللي بيحصل ده؟ طيب إزاي وهي وعمران كبار في السن؟
فضلت تدعي ربنا كتير، ويا سلام على المفاجأة... ربنا استجاب لدعائها! وقالت لربنا اللي في بطني ده ليك أنت بس... أنا جايباه عشان هو اللي يصلح كل ده، ومش عايزة أي حاجة تانية.
- (إِذْ قَالَتِ امْرَأَتُ عِمْرَانَ رَبِّ إِنِّي نَذَرْتُ لَكَ مَا فِي بَطْنِي مُحَرَّرًا فَتَقَبَّلْ مِنِّي ۖ إِنَّكَ أَنْتَ السَّمِيعُ الْعَلِيمُ)
طب هيحصل إيه؟ المفاجأة... ربنا بيرزقها ببنت! وكأن ربنا عايز يقول لنا إنه سبحانه بينصر دينه بمن يشاء!
مريم العابدة: هدية الله للعالم!
(فَلَمَّا وَضَعَتْهَا قَالَتْ رَبِّ إِنِّي وَضَعْتُهَا أُنْثَىٰ وَاللَّهُ أَعْلَمُ بِمَا وَضَعَتْ وَلَيْسَ الذَّكَرُ كَالْأُنْثَىٰ ۖ وَإِنِّي سَمَّيْتُهَا مَرْيَمَ وَإِنِّي أُعِيذُهَا بِكَ وَذُرِّيَّتَهَا مِنَ الشَّيْطَانِ الرَّجِيمِ)
- يا ترى مين الأنثى دي؟ دي سيدة نساء العالمين... السيدة مريم! إنها تسميها مريم، وده دليل على ثباتها برضه رغم إنها أنثى... لأن مريم يعني العابدة أو خادمة العباد.
الرسول عليه الصلاة والسلام بيقول لنا حديث جميل قوي على الآية دي... (ما من مولود يولد ويبكي إلا ويمسه الشيطان.. إلا مريم وعيسى)... طب ليه؟ أصل الأم دعت فربنا استجاب دعوتها!
مريم في بيت المقدس: معجزات ورزق من السماء!
وقصة امرأة عمران هتنتهي هنا عشان تبدأ قصة ستنا مريم. ستنا مريم هي المرأة الوحيدة اللي ذكرت باسمها في القرآن! يعني هنلاقي مثلاً (امرأة عمران، ملكة سبأ)، لكن ستنا مريم مذكورة باسمها صراحة... وذكر اسمها في القرآن ٣٤ مرة >>>> بعدد سجدات اليوم... لأنها كانت كثيرة السجود.
- ستنا مريم كانت بتحب ربنا حب شديد، وبتسجد كتير، وبتحب العمل الخيري، وبتساعد الأيتام والأرامل، وكانت خادمة لبيت المقدس... دي كمان اعتزلت وبعدت عن أهلها عشان تعرف تعبد ربنا براحتها. (وَاذْكُرْ فِي الْكِتَابِ مَرْيَمَ إِذِ انْتَبَذَتْ مِنْ أَهْلِهَا مَكَانًا شَرْقِيًّا)
وسيدنا زكريا كل ما يدخل عليها المحراب يلاقيها بتصلي... لا ده بيلاقي إيه كمان؟ >>>>> ده كل ما يدخل يلاقي عندها رزق، يلاقي فاكهة الصيف في عز الشتاء، وفاكهة الشتاء في عز الصيف، وتكون مخرجتش، ويلاقي عندها أكل كتير... فيسألها يا مريم منين جبتي ده؟ فتقوله هو من عند الله. (كُلَّمَا دَخَلَ عَلَيْهَا زَكَرِيَّا الْمِحْرَابَ وَجَدَ عِنْدَهَا رِزْقًا ۖ قَالَ يَا مَرْيَمُ أَنَّىٰ لَكِ هَٰذَا ۖ قَالَتْ هُوَ مِنْ عِنْدِ اللَّهِ ۖ إِنَّ اللَّهَ يَرْزُقُ مَنْ يَشَاءُ بِغَيْرِ حِسَابٍ).
زكريا يكفل مريم: قصة وفاء ومعجزة!
طب ليه في الآية هنا قال زكريا بالذات؟ لأنه هو اللي كان بيكفلها... يعني إيه؟ بعد موت أبوها عمران.. وأمها طبعًا كبيرة في السن.. بقوا يتخانقوا مين اللي يكفلها، لأن أبوها كان معلمهم، وكان من كبار علماء بيت المقدس. فاتفقوا إنهم هيقفوا عند النهر، ويرموا أقلام... وده وفاء لأبوها، لأنه كان بيعلمهم بالأقلام... وآخر قلم تيار النهر يجرفه هو ده اللي يكفلها (يعني آخر قلم يوصل الشط).
- ورموا... كل الأقلام تجري، وقلم سيدنا زكريا يقف في مكانه ميتحركش... طب نعيد تاني.. برضه ميتحركش... لحد تالت مرة بقى كفلها سيدنا زكريا (وَمَا كُنْتَ لَدَيْهِمْ إِذْ يُلْقُونَ أَقْلَامَهُمْ أَيُّهُمْ يَكْفُلُ مَرْيَمَ وَمَا كُنْتَ لَدَيْهِمْ إِذْ يَخْتَصِمُونَ)....
وبدأت مريم تشوف الملائكة، وتخاطبهم كمان... (وَإِذْ قَالَتِ الْمَلَائِكَةُ يَا مَرْيَمُ إِنَّ اللَّهَ اصْطَفَاكِ وَطَهَّرَكِ وَاصْطَفَاكِ عَلَىٰ نِسَاءِ الْعَالَمِينَ) دي كمان بقت تشوف سيدنا جبريل... ودي منزلة عالية جدًا!
المعجزة الكبرى: مريم تحمل بعيسى وهي عذراء!
دلوقتي خلاص ستنا مريم بقت جاهزة للمعجزة >>>> هيدخل لها سيدنا جبريل المحراب على هيئة بشر، وهيقولها على المعجزة.... إنك هتحملي وتلدي وأنتي عذراء...!! (فَأَرْسَلْنَا إِلَيْهَا رُوحَنَا فَتَمَثَّلَ لَهَا بَشَرًا سَوِيًّا * قَالَتْ إِنِّي أَعُوذُ بِالرَّحْمَٰنِ مِنْكَ إِنْ كُنْتَ تَقِيًّا).
- يعني إيه الآية دي؟؟ هي مكانتش عارفة إن ده سيدنا جبريل... وهي مكنش بيدخل عليها أي راجل المحراب... فخافت منه. فهقول لها إن هو رسول من عند ربنا... (قَالَ إِنَّمَا أَنَا رَسُولُ رَبِّكِ لِأَهَبَ لَكِ غُلَامًا زَكِيًّا) فهتقوله إزاي وأنا لم يمسسني بشر؟! (قَالَتْ أَنَّىٰ يَكُونُ لِي غُلَامٌ وَلَمْ يَمْسَسْنِي بَشَرٌ وَلَمْ أَكُ بَغِيًّا) فهيرد عليها سيدنا جبريل >> ده سهل أوي على ربنا، مش حاجة صعبة... (قَالَ كَذَٰلِكِ قَالَ رَبُّكِ هُوَ عَلَيَّ هَيِّنٌ ۖ وَلِنَجْعَلَهُ آيَةً لِلنَّاسِ وَرَحْمَةً مِنَّا ۚ وَكَانَ أَمْرًا مَقْضِيًّا).
سيدنا عيسى يولد: معجزة تهز العالم!
كلنا عارفين الغلام مين طبعًا >>>> هو سيدنا عيسى. وحملت ستنا مريم، وطلعت برة بيت المقدس وراحت مكان بعيد عن أهلها (فَحَمَلَتْهُ فَانْتَبَذَتْ بِهِ مَكَانًا قَصِيًّا). وهيجيلها المخاض (آلام الولادة) ومفيش قدامها غير نخلة يابسة، وصحراء جرداء (فَأَجَاءَهَا الْمَخَاضُ إِلَىٰ جِذْعِ النَّخْلَةِ قَالَتْ يَا لَيْتَنِي مِتُّ قَبْلَ هَٰذَا وَكُنْتُ نَسْيًا مَنْسِيًّا).
- فهنا يناديها سيدنا عيسى ويقولها: (فَنَادَاهَا مِنْ تَحْتِهَا أَلَّا تَحْزَنِي قَدْ جَعَلَ رَبُّكِ تَحْتَكِ سَرِيًّا) يعني إيه سريا؟.. يعني عين مياه تسري. وبصي كمان فوقيكي النخلة اللي كانت يابسة بقى فيها تمر. (وَهُزِّي إِلَيْكِ بِجِذْعِ النَّخْلَةِ تُسَاقِطْ عَلَيْكِ رُطَبًا جَنِيًّا * فَكُلِي وَاشْرَبِي وَقَرِّي عَيْنًا) ياااه على حنان ربنا!
وهيقولها لما أي حد يكلمك مترديش عليه.. (فَإِمَّا تَرَيِنَّ مِنَ الْبَشَرِ أَحَدًا فَقُولِي إِنِّي نَذَرْتُ لِلرَّحْمَٰنِ صَوْمًا فَلَنْ أُكَلِّمَ الْيَوْمَ إِنْسِيًّا). فهتروح بيه لقومها، ولما هييجوا يكلموها هتشاور عليه ده هو اللي هيرد مش أنا. طبعًا هيستغربوا إزاي هنكلم طفل! (فَأَتَتْ بِهِ قَوْمَهَا تَحْمِلُهُ ۖ قَالُوا يَا مَرْيَمُ لَقَدْ جِئْتِ شَيْئًا فَرِيًّا * يَا أُخْتَ هَارُونَ مَا كَانَ أَبُوكِ امْرَأَ سَوْءٍ وَمَا كَانَتْ أُمُّكِ بَغِيًّا * فَأَشَارَتْ إِلَيْهِ ۖ قَالُوا كَيْفَ نُكَلِّمُ مَنْ كَانَ فِي الْمَهْدِ صَبِيًّا).
المولود يتكلم: معجزة تشهد بوحدانية الله!
هيتكلم بقى سيدنا عيسى، ويرد يقول إيه؟ >>> (قَالَ إِنِّي عَبْدُ اللَّهِ آتَانِيَ الْكِتَابَ وَجَعَلَنِي نَبِيًّا * وَجَعَلَنِي مُبَارَكًا أَيْنَ مَا كُنْتُ وَأَوْصَانِي بِالصَّلَاةِ وَالزَّكَاةِ مَا دُمْتُ حَيًّا * وَبَرًّا بِوَالِدَتِي وَلَمْ يَجْعَلْنِي جَبَّارًا شَقِيًّا * وَالسَّلَامُ عَلَيَّ يَوْمَ وُلِدْتُ وَيَوْمَ أَمُوتُ وَيَوْمَ أُبْعَثُ حَيًّا)....
طب إيه بقى الرسالة اللي وصلتنا من القصة الجميلة دي: أول حاجة: إن لو ربنا حبك هيدافع عنك، وعمره ما هيسيبك. والحاجة التانية: إن ربنا هيستجيب لأي دعوة أنت بتدعيها... بس ربنا له قوانين غيرنا، فارضى، وكل حاجة ولها وقتها... مش شرط اللي طلبته تاخده زي ما هو... امرأة عمران اتمنت ولد، ولكن ربنا رزقها ببنت، بس خلاها سيدة نساء العالمين...
- اوعي تيأس من رحمة ربنا أبدًا، وخلي عندك ثقة فيه، وأبشر بكل خير!
لا تقرأ وترحل، ضع بصمتك بالصلاة على النبي الحبيب. وشاركها لعلها تفتح قلوبًا مغلقة.. إذا شعرت بثقل نشرها، فتذكر عظيم أجرها.. انشرها! منقول
.png)
ليست هناك تعليقات